Museo Catedralicio

A primeira apreciación ao entrar no Museo Catedralicio é sen dúbida contemplar como tal cantidade de obxectos artísticos, tan ricos e variados, fan desta primitiva capela de Santa Catalina un espazo interesante que non deixará indiferente a ningún visitante.


A calidade artística dos retablos, a valía das pezas que nas súas vitrinas se conservan e o preciosismo dos detalles destas conforman este espazo da Catedral Tudense como un dos máis característicos do primeiro templo da cidade, no que a historia e a arte se dan cita en tempo e forma para mostrar xenerosamente o patrimonio tan rico que os séculos legaron a esta coñecida catedral galega.


Como dixemos ao principio, o Museo Catedralicio atópase situado na coñecida como Capela de Santa Catalina, santa que preside o retablo principal flanqueada por diversos santos froito da devoción do bispo impulsor deste espazo sacro: Fray Anselmo Gómez de la Torre, quen a reformou no século XVIII dotándoa de maior altura, deixando constancia deste feito nos seus escudos de armas.


É nesta capela onde se encontran expostas as diferentes pezas artísticas que conforman o Tesouro da Catedral, tales como a rica colección de cálices e vasos sagrados (entre os que destacan os chamados “de Coco” e dos Evanxelistas); unha custodia procesional do século XVII profusamente decorada e de gran valía e unha bela imaxe sedente da Virxe co Neno, de marcados trazos medievais, coñecida como “A Patroa” ou o coñecido e antigo Facistol del Coro, por citar algúns exemplos sobresaíntes.


Cabe destacar que, algunhas das pezas artísticas custodiadas nesta capela-museo, pola calidade da súa feitura e a súa valía histórica, estiveron presentes na Exposición Universal de Barcelona do ano 1929 e na exposición Galicia no Tempo que tivo lugar en 1991.

0 comments on “Museo Catedralicio

Deixa unha resposta